Jude di bura

Ago di ini adina

Mina bura bi Jude rofu ofaofa oteimadedi vene kaere bi mokena vari gira aidedi vo nidedi mina ni diba regika bura reyo. Mina sina tumu bi2 Peter ri kana. Ina yaku ini bura vegedi vene egira regika, “ye Sei yaku ini vene uka vari gira uru yokoimaka maro mina moi gira reyaganedi”.

Beika sina ideriAgo di ini adina1–2Vegu no ma ofa ago oteimadedi vene3–16Yi uka vari gira mana ideri are rei yeiva refa17–23Sei bi ni buni renadi24–25

Jude

1 Mina bura bi Jude rofu, kaere bi Iesu Keriso di naivonaivo amiye ma James di ini dubuini — ^a

Mina bi kaere Sei yaku raka niyo vene rofu. Ma kaere bi Baba Sei yaku ya mokei vava redo ma Iesu Keriso yaku ya nari redo.

2 Iriyeduka, uka amuta ma uka mana bi tora noibanu ya vene di.

Vegu no ma ofa ago oteimadedi vene

3 Nai mokei vava reida vene, na bi nai mokena tora noibanu dudu una moi vegu rena sina vakoi resifa mina ya rofu bura reida. Ye nai mokena bi ya rofu bura resi ya egira regida, ye uka vari gira di ruda reyagane, goina bi Sei yaku uru yokoimaka ini vene maro. 4 Adina be vene yaku yi rafuri, sui ida dudu sena baiyadi. Mina vene bi ini obini moiyadi goina bi sena bura reyadi. Mina vene bi Sei ina diba de, kaere bi uni Sei di ini buni toragade di sina mina moi idana risi vava maradi, vegu no resi Iesu Keriso uni Ourefeidena Amiye Tora yokoimaka ma Warika Amiye mina ni sui reyadi.

5 Ya mina ago bi sena diba niyadi, mina resi nai ura bi dubusa ya nigida. Warika Amiye ^{▼▼v.5Warika Amiye;Bura bedakai biIesu,mina bi Greek agori, idu Hebrew agori biJoshua.} yaku ini vene Egypt gaganiri gutuna moi yakuyo. Idu, kaere ina rofu mokena vari gira de aiyadi bi gabi moi no reyo. ^c 6 Ma naivonaivo vima be kaere bi ini moimai di vava moi gira de reyadi bi ini yava fereyadi. Mina vene bi toga ameibigo seini aisi mukunari fereyo, ye kota rego meda tora nari reyaganedi. 7 Mina kana, Sodom ma Gomorrah ma ini adinari taoni ka koa rena vegu reyadi. Mina kana vene bi vena di toga ameibobigo ita di esikaesika moigedi. ^d

8 Mina ida kana, mina yaduka vededi vene yi rafuri yaku iniye ini rovaita moi no risi, ourefeidena vene fufuta masi oma ideri amededi vene ni fafana rededi. 9 Idu Michael naivonaivo vima tora iniye, mina yaku Satani sa kayamo reyadi, kaere yaku Moses di rovaita moigo mina. Mina medari Michael iniye yaku Satani ni fafana de reyo. Yomakai maka niyo, “Warika Amiye yaku ini kaunava ya mago!” ^e 10 Idu, mina ofa ago oteimadedi vene yaku beika diba de niyadi, mina rofu ni fafana rededi. Ina vene bi sufa dona nadina di mokena kana, mina beika baika diba niyadi ini amutenari mina yaku ina vene moi no rido. 11 Iriyeduka ina vene rofu! Ina vene bi Cain di ida moiyadi. Ina bi Balaam di ini no reyo ida kana fore baku regedi vo nisi evade maka reyadi. Korah ^{▼▼1.11Korah yaku Moses ma Aaron rofu ruda regi ourefeideyo. Sei gubuyo iniye resi kono moi eboka reyo ma Korah ini usi dina vene sa iriyo. Num 16.1–35 baku re.} yaku Moses di ago obe reyo kana, ina ka makai resi tauvakoi roro niyadi. ^g 12 Mina vene bi ekalesia irakunari naguma kana maena de iruku irigedi. Ina bi mamoe nari vene kana kaere bi iniye maka iriiri rededi. Ina bi miya de redo seuya kana, aura yaku ufu redo. Ina bi yabo kakari meko varena de, ye muyena iniye reyainedi daru sa yai rei makudedi kana. 13 Ina vene bi davara di ini ureure kana, ini maena bi davara di kabudo kana fonufonu rei baido. Ina bi yaveru kana, adina Sei yaku toga ameibigo mukuna girigiri sana ferei maro.

14 Enoch, Adam gutuna naba viro vara tutubena yaku sena dobau mina vene dada niyo, “Vefa, Warika Amiye bi ini akeke vene taugadegade sa dego, ^h 15 ina vene tau kota resi vegu no rededi vene tau di vegu no tau ogau rego, mina kaere bi ini vegu no idaidari regamadi, ma ina yaku karaini ago toe tau ina rofu nigamadi mina!”

16 Mina vene bi ago sika vene ma goidu no be regedi maina vene; ina bi ini mokena tari rei didedi vene; iniye ini roka moi odoro vene ma idana di ini roka moi odoro reyagane iniye di ini buni dada.

Vei mona ma reremama ago

17 Idu, ya mokei vava reida asiyaka, va mokefo beika uni Warika Amiye Iesu Keriso di ni feidena vene sena niyadi mina. 18 Ina yaku niyadi bi, “Ari tumu nibigo ri ninika nina vene kaere bi iniye di ni mokemoke no mina tari rei dibigedi.” ⁱ 19 Mina vene yaku utama ya okugedi, kaere bi ini amutenari ma Vima Kikifa de mina tari rebigedi. 20 Idu ya vene, nai mokei vava reida asiyaka, ya kaya yi akeke uka vari gira mina fafau are rei gira resi Vima Kikifa nufa usausa nibifa. 21 Sei di ini uka mana fafau are rei gira resi Warika Amiye Iesu Keriso di iriyeduka nari regasa, mina yaku ya moi bogo toga ameibobina vegu.

22 Kaere mokena remanu moibigedi vene rofu bi iriyeduka rebifa; 23 Be vene mina ita moka gutuna moi dairifa; be rofu bi iriyeduka rego ori vakoi sa; iniye di varuka vegu no di kino nufa mina ka ura de regedi.

Sei ni vakena di usausa

24 Vabara ina rofu nigo kaere yaku keto renari ya moi are rego ma ini vabara iniye di budari goina bi yi no yokoi de minari ya aigo ma ada toragade sa— 25 Vabara, roka tora odoro iniye, ma vava Iesu Keriso uni Warika Amiye dudu bi uni Sei, una moi vegu rina amiye yokoimaka mina rofu di, ini adinari gutu, ma gua ma toga ameibobigo! Rama.